DENTER FARGLIUNS - Parabla per duas persunas
In teater en duas versiuns dad Andreas Cadonau
Presentaziuns: Mintga sera naven dils 19 da fenadur entochen ils 2 d'uost 2008 el casti Grotta a Vuorz
Dus fargliuns che creschan si en in ambient socialmein avanzau ed en relaziuns ch’ins astga titular per ordinarias, fan in viadi terrester diltuttafatg cuntrai. Suenter in’affonza communabla sespartan lur vias. In dils fargliuns fa ina carriera ch’ins titulescha per normala. El sescolescha, fundescha famiglia e secuntenta pli u meins cun ina veta beinreglada. Pudess ins crer! Tuttavia buca cuntents da siu destin, fa el in pass pauc usitau per rumper il tscherchel.
Gl’auter fargliun tscherca da bial’entschatta il conflict cun la societad. Sia carriera criminala che sevilupescha continuadamein procura che duas baras schain vonzei per tiara, mortas tras siu maun. Demai ch’el viva en in stadi ch’enconuscha la peina da mort, spetga el ella cella reservada als sentenziai alla mort sin l’execuziun.
Cheu entscheiva „Denter fargliuns“. In fargliun viseta l’auter che sesanfla ella cella dils sentenziai alla mort e quei exact 24 uras avon l’execuziun.
„Denter fargliuns“ ei buc exnum ina confruntaziun cun la peina da mort. Il teater ei ton parabla dalla veta humana ch’ei neu da sia natira terminada e che lai tschentar la damonda suenter veglia e destin.
La presentaziun denter la miraglia dil Casti Grotta porscha duas differentas inscenaziuns. Ina ga giogan dus umens las rollas da dus frars che s’entaupan ella cella. La proxima gada presentan duas dunnas il medem teater e pli u meins las medemas rollas. Ina sora s’entaupa cun l’autra 24 uras avon l’execuziun.
Inscenaziun feminina, giugaduras:
Dunna dalla vart seniastra: Annalisa Halter
Dunna dalla vart dretga: Romana Brunold
Inscenaziun masculina, giugadurs:
Um dalla vart seniastra: Curdin Cadonau
Um dalla vart dretga: Mathias Pfister
Cant: Ann Nielsen
Autur e reschia: Andreas Cadonau
Il Casti Grotta cun sia cumparsa singulara ha motivau L’Uniun da teater Vuorz da purtar nova veta ella miraglia, buca sco davos per render attent ad in liug miraculus che lai sminar da quitaus e plaschers d’in temps daditg stuliu.
Il Casti Grotta (Kropfenstein) ch’ei vegnius baghegiaus all’entschatta dil 14avel tschentaner sesanfla sut in grugn en ina preit crap spuretga denter Vuorz e Breil. Igl edifeci ch’ei vegnius restauraus ils onns 50 ei in dils paucs castials da tauna (Grottenburgen) che surveva buca sco davos refugi mobein sco residenza da famiglias noblas da gliez temps.
El ha pli probabel dau albiert alla famiglia feudala von Kropfenstein tochen alla fin dil 15avel tschenaner. Suenter ei il habitadi spectacular ius plaunet en decadenza.
anavos:
Producziuns 
